പി പി മമ്മദ് കോയ പരപ്പിൽ
ഒരു നഗരത്തിന്റെ പ്രാദേശിക ചരിത്രവും ഒരു സമുദായത്തിന്റെ വീരേതിഹാസവും ഒന്നിച്ചു കൂട്ടിക്കലർത്തിയുണ്ടാക്കിയ ഇത്തരം ഗ്രന്ഥങ്ങൾ മലയാളത്തിൽ അപൂർവമാണ്. ഇല്ലെന്നുതന്നെ പറയാം. അത്തരം ഒരു സാഹസത്തിന്നാണ് മമ്മത്കോയ പരപ്പിൽ മുതിർന്നിട്ടുള്ളത്.
അദ്ദേഹം ചരിത്രപഠനത്തിൽ ബിരുദമോ പരിശീലനമോ നേടിയിട്ടില്ല. എങ്കിലെന്താണ്? വല്ലഭന് പുല്ലുമായുധം എന്നല്ലേ പതിരില്ലാത്ത പഴഞ്ചൊല്ലിൽ കുറിച്ചുവെച്ചിട്ടുള്ളത്? ചിലർക്ക് ജന്മംകൊണ്ടും കർമംകൊണ്ടും ചില വാസനകൾ വളർത്തിയെടുക്കാൻ അവസരങ്ങൾ അപൂർവമായി ലഭിക്കുന്നു. അത്തരം അസാധാരണമായ ഒരു സംഭവമാണ് ഈ ഗ്രന്ഥം.
– ഡോ. എം ജി എസ് നാരായണൻ
ഇത് കേവലം ഒരു പ്രദേശത്തിൻ്റെ മാത്രം ചരിത്രമല്ല; കേരളത്തിലെ ഇസ്ലാമികാവിർഭാവം മുതൽ ഇന്നോളമുള്ള മുസ്ലിം സാമൂഹിക ചരിത്രം കൂടിയാണ്. കേരളോൽപ്പത്തി മുതൽ ഇസ്ലാമിൻ്റെ ആഗമനവും പ്രചാരണവും പണ്ഡിതരുടെ സംഭാവനകളുമെല്ലാം രേഖകൾ സഹിതം വിവരിക്കുന്നുണ്ട് ഈ കൃതിയിൽ, അധിനിവേശത്തിനെതിരെ പൊരുതിയ സാമുതിരിയുടെ പ്രിയപ്പെട്ട പ്രജകളുടെ ചരിത്രം കൂടിയാണിത്.
അധ്യാപകരും ഗവേഷകരും വിദ്യാർഥികളും സാധാരണക്കാരും ചരിത്രാന്വേഷണത്തിന് ഒരുപോലെ അവലംബമാക്കിയ മലയാളത്തിലെ ബെസ്റ്റ് സെല്ലർ കൃതിയുടെ പരിഷ്കരിച്ച പതിപ്പ്.
